दोस्रो संस्करणको नेपाल प्रिमियर लिग (एनपीएल)मा आज सोमबार कुनै खेल तय गरिएको छैन । नेपाल क्रिकेट संघले मंसिर १ गतेदेखि जारी प्रतियोगिताको खेल तालिकामा आजका लागि कुनै पनि खेल राखेको छैन ।
भोलि मंगलबार भने कीर्तिपुरस्थित त्रिवि अन्तर्राष्ट्रिय क्रिकेट रङ्गशालामा दुई खेल हुनेछन् ।
पहिलो खेल बिहान ११ः४५ बजे जनकपुर बोल्ट्स र चितवन राईनोजबिच हुनेछ । दिउँसो ४ः०० बजे हुने दोस्रो खेलमा पोखरा एमेन्जर्स र कर्णाली याक्सबीच हुनेछ ।
हालसम्म १९ खेल सम्पन्न हुँदा सुदूरपश्चिम रोयल्स अपराजित रहेको छ । रोयल्स १० अंकसहित तालिकाको शीर्षस्थानमा रहँदै प्ले अफका लागि क्वालिफाइड भइसकेको छ । समान ८–८ अंक भएको काठमाडौँ गुर्खाज दोस्रो र विराटनगर किङ्स तेस्रो स्थानमा छन् ।
चितवन राईनोज तथा लुम्बिनी लायन्स समान ४ अंकका साथ क्रमशः चौथो र पाँचौँ स्थानमा छन्।कर्णाली याक्स छैटौँ र पोखरा एमेन्जर्स सातौँ स्थानमा छ। साबिकको विजेता जनकपुर बोल्ट्स तालिकाको अन्तिममा छ । प्रतियोगिताको फाइनल मंसिर २७ गते हुनेछ।