विराटनगर , ७ असोज । असोज २८ गतेदेखि कात्तिक ४ गतेसम्म बेलबारीमा छैटौँ संस्करणको अन्तर्राष्ट्रिय आमन्त्रण गोल्डकप प्रतियोगिता हुने भएको छ । डाँगीहाट फुटबल क्लबको आयोजनामा बेलबारी नगरपालिका–११ लक्ष्मीमार्गमा प्रतियोगिता हुने भएको हो ।
प्रतियोगिताको बिजेताले आठ लाख पुरस्कार प्राप्त गर्नेछन् । उपविजेताले पाँच लाख प्राप्त गर्ने आयोजक क्लबका अध्यक्ष विक्रम वान्तवा राईले जानकारी दिए ।
प्रतियोगितामा उत्कृष्ट खेलाडी, उत्कृष्ट गोल्डकिपर, उत्कृष्ट डिफेण्डर, उत्कृष्ट मिडफिल्डर, उत्कृष्ट कोच, सर्वाधिक गोलकर्ता, उदीयमान खेलाडी, हरेक दिन म्यान अफ दि म्याच प्रदान गरिनेछ ।
प्रतियोगिता सञ्चालनका लागि ६२ लाख ९० हजार खर्च हुने अनुमान आयोजकले गरेको छ ।
प्रतियोगितामा ए डिभिजन लिग च्याम्पियन टोली चर्च ब्वाईज काठमाडौँ, बिग्रेड ब्वाइज क्लब काठमाडौँ, सहलेश युवा क्लब सिरहा, रारा फुटबल क्लब धनकुटा, आयोजक डॉगीहाट यूथ क्लब, बिर्तामोड युनाइटेड झापा, भोजपुर जिल्ला फुटबल क्लब र युकेएफसी भारत सहभागि हुनेछन् ।
बेलबारी गोल्डकपको गत वर्षको उपाधि एपीएफ काठमाडौँले जितेको थियो ।
