स्वास्थ्य बिमा बोर्डले वित्तीय संकट गहिरिँदै गएपछि निजी स्वास्थ्य संस्थामार्फत प्रदान गरिँदै आएका स्वास्थ्य बिमाका सेवा स्थगन गर्ने निर्णय गरेको छ । बोर्डले अर्को निर्णय नभएसम्म आकस्मिक सेवाबाहेकका सम्पूर्ण स्वास्थ्य बिमा सेवा बन्द गर्ने जनाएको हो ।
बोर्डका अनुसार नेपाल सरकारको स्वास्थ्य बिमा कार्यक्रममा आबद्ध निजी अस्पताल तथा मेडिकल कलेजहरूमा मिति २०८३ साल जेठ १६ गतेदेखि आकस्मिकबाहेकका अन्य सेवा स्थगन हुनेछन् । यो निर्णयसँगै स्वास्थ्य बिमामार्फत निजी अस्पताल तथा मेडिकल कलेजमा उपचार गराउँदै आएका सर्वसाधारण प्रत्यक्ष प्रभावित हुने भएका छन् ।
बोर्डको यही जेठ ११ गते बसेको बैठकले सेवा स्थगन गर्ने निर्णय गरेको हो ।
यसैबिच
स्वास्थ्य बीमा बोर्डले बीमितलाई दिने औषधि पनि कटौती गरेको छ।
अहिलेसम्म २८९ किसिमका औषधि दिँदै आएको बोर्ड अब १७० किसिमका मात्रै औषधि दिने निर्णय गरेको हो । बोर्डले स्वास्थ्य उपचारका लागि ‘सुविधा थैली’ को दररेट परिवर्तन गरेको छ ।
स्वास्थ्य बीमा लागू भएपछि पहिलो पटक बोर्डले औषधि, औषधिजन्य सामग्री, स्वास्थ्य सेवा, शल्यक्रिया तथा प्रयोगशालको परीक्षणको सुविधा थैली दररेट परिवर्तन गरेको हो ।
बोर्डका कार्यकारी निर्देशक शकुन्तला प्रजापतिले सबै सेवा प्रदायक स्वास्थ्य संस्थालाई परिमार्जित नयाँ दरअनुसार औषधि, औषधिजन्य सामग्री, स्वास्थ्य सेवा, शल्यक्रिया तथा प्रयोगशालको परीक्षण शुल्क लिन निर्देशन दिएको बताइन् ।
नयाँ सुविधा थैलीको दररेठ यही जेठ १६ गतेदेखि लागू हुनेछ ।