सभापति आचार्यको सक्रियता

काठमाण्डौ, १४ माघ । दलहरुबीच पछिल्लो समय देखिएको विवादले संविधान निर्माणको कार्य समेत प्रभावित भएपछि संवैधानिक समितिका सभापति निलाम्बर आचार्यले विवाद समाधानका लागि चासो देखाउँनु भएको छ । पछिल्लो समय सवैधानिक समितिका बैठक पनि निश्कर्षबिहीन हुन थालेको र विवाद समाधान उपसमितिका निर्णयहरु पनि अनुमोदन हुन नसकेपछि  यसविषयमा छलफल गर्न सभापति आचार्यले आज संविधानसभामा प्रतिनिधित्व गर्ने दलहरुको सर्वदलिय बैठक बोलाउँनु भएको छ । अपरान्ह २ बजेपछि सिंहदरवारमा बोलाइएको बैठकमा पछिल्लो समय अवरुद्ध भएको संविधान निर्माणको प्रक्रियाका बारेमा छलफल हुने बताइएको छ । पछिल्लो पटक निर्माण गरिएको कार्यतालिका सकिन दुई दिनमात्र बाकी रहेको अवस्थामा पनि दलहरुबीच विवादित विषयमा कुनै सहमति नभएपछि त्यस विषयमा छलफल गर्न बैठक बोलाइएको सभापति आचार्यले जानकारी दिनुभयो । पछिल्लो पटक संशोधित कार्यतालिका अनुसार राज्यपुनर्संरचना बाहेकका विवादमा भोलिसम्म सहमति खोजिसक्नु पर्नेछ । तर भएका सहमतिहरु पनि उल्टिन थालेपछि दलहरुबीच भोलीसम्मा सहमति जुट्ने संभावना अत्यन्त न्यून रहेको छ । समितिमा सहमति हुन नसकेका विषयहरु संविधानसभामा मतदान मार्फत टुंग्याउँनु पर्ने प्रावधान राखिएको छ ।