सरकारी बिद्यालयमा पनि अंंग्रेजी माध्यममा पढाई

इलाम १६ भदौ । बालबालिकाको पढाइमा सुधार गर्ने उद्देश्यले इलामको गोदकस्थित नन्द माध्यमिक विद्यालयमा जिल्लामै पहिलोपटक अंग्रेजी माध्यमबाट पढाइ सुरु गरिएको छ । निजी तथा बोडिङ्ग स्कूलहरुप्रति विद्यार्थी र अविभाकको रुचि बढ्न थालेपछि त्यसलाई निरुत्साहित गर्न अंग्रेजी भाषाको माध्यमबाट पढाइ सुरु गरिएको हो । बालमैत्री नमुना विद्यालय कार्यक्रम सुरु भएको विद्यालयमा बोडिङ्गमा सरह नर्सरी, केजीदेखिका कक्षाहरु सुरु गरिएको र जसका लागि ८ जना शिक्षकहरु निजी श्रोतबाट राखिएको विद्यालय व्यवस्थापन समितिका अध्यक्ष रोम लुङ्गेलीले बताउनुभयो । लुङ्गेलीका अनुसार त्यसरी कक्षा सञ्चालन गर्न अविभावककै सल्लाह र सहयोगमा भर्ना शुल्कका रुपमा विद्यालयलाई वार्षिक एक हजारदेखि कक्षाअनुसार दुई हजार रुपैयाँसम्म सहयोग रकम उपलब्ध गराउने गरिएको छ । विद्यालयमा नर्सरीदेखि कक्षा दशसम्म ५ सय बढी विद्यार्थीहरु अध्ययनरत छन् ।